Bull á miðvikudagskvöldi

Ég sá áðan lokin á landsleik Íslands og Noregs og þegar Íslendingar minnkuðu muninn í 6-2, sagði annar lýsandinn að núna væri staða Íslendinga að vænkast - og það var eins og hann meinti það. En leikurinn endaði svo 7-2, þannig að þetta tap var mun vænna en 14-2.

Annars langar mig að prófa svona brjótasamandót sem Hagkaup er að auglýsa - það er svo fyndið að sjá hversu hratt þetta gengur í auglýsingunni, ef ég væri að gera þetta myndi ég beygja þetta í vitlausri röð, því þótt þetta virki einfalt er þetta örugglega ekki aulahelt.

Svo sá ég Bráðarvaktarauglýsingu áðan og Carter virðist vera kominn aftur - jibbý og svo var Rory loksins rekinn úr Survivor, æðislegt að sjá hvað hinir kallarnir voru fúlir í atriðum næsta þáttar. Ég held með Twilu en í augnablikinu er Ami sigurstranglegust - en allt getur nú breyst og ég fylgist spennt með því :o)

Og svo er svo langt síðan ég hef tekið svona próf...


You're Marilyn Monroe!


What Classic Pin-Up Are You?
brought to you by Quizilla

Ekki í góðu skapi

Núna er ég búin að kenna sex daga af 25 og ég er búin að ákveða að ég ætli ekki að fara í kennslufræðina - kemur ekki til mála að verða kennari.

Sex dagar og ég er búin að missa röddina gjörsamlega, krakkakvikindin geta ekki haldið sér saman nema í fimm mínútur í einu og skrópa svo í prófum og tímum og kenna misskilningi um og halda að þau eigi þá að fá mætingu - fífl!!!

Svo tekur þetta upp allan tímann að finna eitthvað til að láta þau gera, búa til verkefni og próf - og eru þau þakklát, ónei, þau reyna bara að sleppa eins auðveldlega frá öllu og mögulegt er. Ég er með einn bekk sem er í lagi en tvo sem eru hryllilegir, ef ég væri bara með bekki eins og þann fyrsta myndi ég íhuga kennarastarfið, en eftir hina tvo þá segi ég bara nei takk.

Nú sit ég með sáran háls, þreytt augu og búin að finna enn eitt starf sem mig langar ekki til að vinna við. Gott samt að hafa komist að því áður en ég fór í kennslufræðina. Bara 19 dagar eftir - get ekki beðið.

Er enn á lífi

Ég lifði fyrsta daginn minn sem kennari af (sem betur fer því ég verð að standa undir fínu nafngiftinni sem Ragnheiður gaf mér). Reyndar kenndi ég bara tvo tíma, en það var alveg nóg. Ég var búin að gleyma hversu leiðinlegir menntaskólanemar geta verið. Þarna var fólk að tala saman, hlusta á geislaspilara og reyna að trufla mig eins mikið og mögulegt er. Þau eru ekki þarna til að læra af sjálfsdáðun, það er alveg ljóst.

1. bekkurinn var allt í lagi - þau hlýddu öllu og dugði að vera svolítið leiðinleg við aðalkjaftaskana til að allt lagaðist. 2. bekkurinn var verri, þóttust aldrei hafa heyrt um bókina sem þau eiga að vera búin að lesa, nema kannski að kennarinn hafi sagt eitthvað um það í síðustu viku. Þegar ég benti þeim svo á að þau hefðu kennsluáætlun sem tæki það skýrt fram að þau ættu að vera búin að lesa þessa bók, hélt ein stelpan því fram að þau ættu ekki að þurfa að lesa kennsluáætlunina, kennarinn ætti að segja þeim allt sem þau þyrftu að vita!!!

Stjörnuspáin mín í mogganum fyrir laugardaginn var alveg furðulega rétt - í henni stóð eitthvað á þessa leið: Þú átt eftir að öðlast fjármuni í dag en þú verður að passa þig á eyðslunni. Og viti menn, áður en ég las stjörnuspána þá hafðí ég komist að því að ég var búin að fá útborgað fyrir október og af því tilefni pantað geisladiska með Travelling Wilburys í gegnum netið.

Ég held að ég ætti að fara að loka vísakortinu mínu - það er nefnilega alveg stórhættulegt að eiga svoleiðis og vera nettengd. Ég tók líka smá syrpu á Amazon fyrir helgi. Nú vona ég bara að ég lendi ekki í því að þurfa að borga mikla tolla af öllu nýja dótinu mínu og þá get ég bráðum farið að munda vísakortið aftur :o)

Kennsluógn

Og breytingarnar halda áfram, ég litaði á mér hárið í fyrsta skipti á þriðjudaginn (sést reyndar ekki mikill munur). Það heppnaðist framar vonum kannski út af því að litla systir hjálpaði mér fullt (lesist hún sá um það - ég er ekki fær um svona hluti) enda var hún að lita á sér hárið og ég fékk leifarnar af þeim háralit. Samt er hárið okkar ekki eins á litinn núna, enda hafði ég litinn ekki jafnlengi í og hún og setti auk þess ekki jafnmikinn lit í.

Á mánudaginn fer ég að þykjast vera kennari. Ég held að sá misskilningur hafi orðið að ég kynni að kenna (sem ég kann ekki og er ekki með próf upp á), en ég hef engar áhyggjur af því - það reddast. Það sem ég hef áhyggjur af er að ég hef ekki hugmynd um hvar þau eru nákvæmlega stödd, á hverju ég eigi að láta þau byrja í næsta tíma og svoleiðis. Við fórum á fund fyrir viku með kennaranum sem við erum að fara að leysa af, en ég var litlu nær eftir það - svo ég vona að hann svari tölvupóstinum sem ég sendi honum áðan.

En annars vona ég að krakkagreyin (verða örugglega orðin að skrýmslum eftir helgi) verði til friðs og leyfi mér að tala. Ef þau ætla að vera eitthvað óþekk, nota ég bara lyklakipputrixið sem ég lærði í fyrra (það borgaði sig sko að hanga með krökkunum sem voru í kennslufræðinni þá) en það felst í því að mæta með risastóra lyklakippu og fleygja henni í borðið, skv. the dummies guide to teaching á það að skila sér í óttablandinni virðingu nemenda sem á að endast önnina. Ég veit ekki hvort þetta virkar, en mér fannst þetta gagnlegra en allar ígrundanirnar sem þau þurftu að skrifa.

En eitt af því sem ég á að kenna er skáldsagan Óvinafagnaður sem gerist á Sturlungaöld og fjallar um baráttu Þórðar kakala við Kolbein unga. Til þess að fá bakgrunnsupplýsingar um kappana ákvað ég að lesa Þórðar sögu kakala - ég hætti á blaðsíðu 20 því mér ofbauð. Þessir karlar fóru um héruð og fóthuggu og drápu menn fyrir engar sakir, aðallega af því að þeim leiddist eða eitthvað. Og svo eru menn að kvarta yfir handrukkurum nútímans!!! Ekki það að þeir séu ekki slæmir, en að ímynda sér hvílíkan hrylling forfeður okkar sem voru almúgafólk hefur þurft að láta yfir sig ganga.

Breytingaskeið

Ég er öll í því að breyta öllu þessa dagana. Bloggsíðan er orðin græn (allt er vænt sem vel er grænt), því hún var fullmikið bleik. Svo skipti ég um hringitón á símanum mínum, sem leiðir til þess að hann getur hringt og hringt við hliðina á mér án þess að ég fatti að þetta er minn sími, svo skil ég ekkert í að það skuli vera svona mikið um missed calls. Er að hugsa um að endurráða Alf Poier, allaveganna fattaði ég alltaf að svara þegar hann hringdi.

Survivor fundurinn gekk vel fyrir utan það að Rory var ekki rekinn í burtu - ég er orðin svolítið pirruð á honum. En hins vegar verða liðþjálfinn og Twila svolítið skemmtilegt par :o)


Og svo fyrst ég veit ekki hvað ég er að gera, þá er ágætt að vita hvaðan ég kom


You came from the sky. Your a daydreamer and prefer
to have a good look on situations.


Where did you come from?
brought to you by Quizilla

meira pláss

Sú stórskemmtilega breyting varð á hi-pósthólfinu mínu í síðustu viku að plássið í því jókst. Ég veit reyndar ekki alveg hvað gerðist, en á fimmtudagsmorguninn var pósthólfið mitt alveg stíflað svo ég henti öllum nýjum pósti og innihald pósthólfsins hrapaði niður í 44% og hefur haldið sér þar síðan. Ég hef ekki hugmynd um hvað gengur á en er bara ánægð, því venjulega er ég að berjast við að halda því undir 95%.

Annars hefur þessi helgi ekki staðið undir fögrum fyrirheitum um allt sem ég ætlaði að vera svo dugleg að gera :o( og sver sig þannig í ætt við aðrar helgar. Verkefnin sem ég ætla að fara yfir og þarf að skila á þriðjudaginn eru ekkert meira yfirfarin en á föstudaginn og verkefnið sem ég hefði eiginlega átt að skila á morgun (en fékk óvart frest með fram til 8. nóvember) jafnóskrifað.

En ég las þó Óvinafagnað og þó að bókin sé ágæt, hlýtur hún að vera martröð fyrir fólk sem veit ekkert um Sturlungaöldina - vona að fólkið sem ég ætla að pína í MS hafi lært eitthvað um Sturlunga, ef ekki þá erum við öll í djúpum skít (eða á betra máli, öll sokkin í svaðið). Er virkilega farin að hugsa um að mæta bara með Sturlungaspilið í tíma og láta alla spila smá, svona til að fá meiri tilfinningu fyrir persónum og staðarháttum.

Er reyndar í sjokki að vera að fara að þykjast vera kennari í tvo mánuði - en ég býst við að þetta sé bara að hrökkva eða stökkva, ágætt að prófa þetta í smá tíma áður en ég ákveð hvort ég eyði ári í kennslufræðina eður ei.

En á morgun er survivor fundur - og það er alltaf gaman að svoleiðis, ég held stundum að þetta fyrirtækjabrölt í okkur sé bara afsökun til að koma saman og horfa á Survivor :o) Ég vona að Rory verði rekinn burt næst og þá verður í mesta lagi ein stelpa rekin burt fyrir sameiningu og stelpurnar verða þá í meirihluta.

Góðu fréttirnar eru þær að nýja nettengingin er loksins komin í gang. Slæmu fréttirnar eru þær að þráðlausi hlutinn af þeirri tengingu er ekki kominn í gagnið og snúran sem fylgir er svo stutt að netnotkun verður öll að fara fram við símaborðið. En það er allt í lagi þegar enginn, sem gæti dottið um allar snúrurnar, er að flækjast í kring um mann.

En fyrir utan nettengingar og netleysi snýst lífið ekkert um annað þessa dagana en að vinna borða og sofa - og það á bara eftir að versna í nóvember. Ég held að pabbi hans Elíasar hafi verið mikill spekingur þegar hann sagði að lífið væri vinna borða sofa x 5 og borða sofa x 2, en eins og unglinga er háttur tók Elías ekkert mark á honum (og hvar ætli hann sé í dag?)